ಶುಂಠಿ ಬೆಲ್ಲದ ಬಟ್ಟಲು,  ನಿಮ್ಮ ಮುಂದೆ-

ನಾನು ಆರಂಭಿಸುತ್ತಿರುವ  ಈ ಬ್ಲಾಗಿಗೆ ತಮಗೆ ಆತ್ಮೀಯ  ಸ್ವಾಗತ. ನಾನು ಈ ಹಿಂದೆ ಆರಂಭಿಸಿದ್ದ ಕೆಲವು ಬ್ಲಾಗುಗಳನ್ನು ಕಾರಣಾಂತರಗಳಿಂದ ನಿಲ್ಲಿಸಬೇಕಾಯಿತು. ಆ ಬಗ್ಗೆ ಕ್ಷಮೆ ಕೋರುತ್ತೇನೆ.
ಶೀರ್ಷಿಕೆಯಿಂದ  ಭಾಸವಾಗುವಂತೆ ಇದು ಹಳ್ಳಿ ಮದ್ದಿನ ಬಗ್ಗೆ ಇರುವ ಬ್ಲಾಗಲ್ಲ. ಶುಂಠಿ ನಾಲಿಗೆಗೆ ಖಾರ. ಶರೀರಕ್ಕೆ ಹಿತಕಾರಿ. ಬೆಲ್ಲ  ನಾಲಿಗೆಗೂ ಮಧುರ, ತಿನ್ನುವವರಿಗೂ ಸಂತೋಷದಾಯಕ. ನಮ್ಮ ಸಾಹಿತ್ಯ ಲೋಕದಲ್ಲಿ ಶುಂಠಿಯೂ ಬೆಲ್ಲವೂ ಸಾಕಷ್ಟಿವೆ. ನಾನು ಅಂಥವನ್ನು ಸವಿದಾಗಲೆಲ್ಲ ಬೇರೆಯವರೂ ಇದನ್ನು ಆಸ್ವಾದಿಸಲಿ ಎಂಬ ಅಪೇಕ್ಷೆ ಹುಟ್ಟಿದ್ದರಿಂದ ಈ ಬ್ಲಾಗು ಹುಟ್ಟಿಕೊಂಡಿತು.

ಮೊದಲಿಗೆ ನಾನೇ ರಚಿಸಿರುವ ಒಂದು ಮುಕ್ತಕ. ಇದನ್ನು ಒಂದು ಬೆಲ್ಲದ ಚೂರೆಂದು ಸ್ವೀಕರಿಸಿ.
ಇದನ್ನು ಮೊದಲ ಬಾರಿ ಓದುವಾಗ, ಮಾತೊಂದ, ರಿಂದಲೆ, ಕೆಲಸ, ವಾಗುವ ವೇಳೆ, ಎರಡನೆ, ಮಾತನು, ಉಳಿಸು.  ಹೀಗೆ ವಿಭಾಗ ಮಾಡಿಕೊಂಡು ಓದಿದರೆ  ಓದಲು ಸಲೀಸಾಗುತ್ತದೆ.
ಮಾತು-ಮೌನ 
ಮಾತೊಂದರಿಂದಲೆ ಕೆಲಸವಾಗುವ ವೇಳೆ
ಎರಡನೆ ಮಾತನು ಉಳಿಸು.
ಮೌನದಿಂದಲೆ ಕಾರ್ಯ ಸಾಗುತಲಿರುವಾಗ
ಮಾತಾಡದಿರುವುದೆ ಲೇಸು.

ಇನ್ನು ಸಾಹಿತ್ಯಲೋಕವನ್ನು ಪ್ರವೇಶಿಸೋಣ.